KaqJay Moloj

KaqJay jun moloj nuk'un kuma ajna'oj winaqi', ri jalajöj ketamab'al, nikich'ab'alij chuqa' nikisamajij ri kaqchikel ch'ab'äl. Ri b'i'aj KaqJay nuk'un kuma ri tzij käq chuqa' jay; niqichinaj re jun b'i'aj re' ruma chupam ri kiwujil kaqchikela' k'o jun k'ojlib'äl ke ri' rub'i' chuqa' pa ri jun k'ojlib'äl ri' xtz'ukutäj kik'aslemal ri kaqchikel winäq.

Pa KaqJay Moloj yalan k'o rejqalem ri kaqchikel ch'ab'äl, jun ch'ab'äl xqetamaj pe chi qochoch (pa jay kik'in konojel qach'alal) chuqa' pa qatinamit (pa k'ayb'äl, pa tijob'äl, kik'in qachib'il,...).

Rik'in re jun ruxaq k'amaya'l re' niqajo' niqaq'alajisaj rutzijol ronojel ri samaj tajin nib'an pa ruwi' ri kaqchikel ch'ab'äl. Ruma ri', ri Kaqjay Moloj numöl ruchi' retal kisamaj winaqi' nikisamajij ri Kaqchikel ch'ab'äl pa jalajöj etamab'äl, achi'el pa ruwi' k'amaya'l, tijonïk, choltzij, soltzij, kemchi', b'ixanïk, pach'unïk tzij…

Ruma k'a ri' ri KaqJay Moloj ka'i' ri nima'q taq rurayb'al rutzeqelib'en chuqa' tajin nusamajij: Ri nab'ey, tokisäx ri k'ak'a' taq samajib'äl tajin yetz'ukutäj pe pa kaqchikel ch'ab'äl, ja k'a ri ruk'an, Kemol chuqa' ketz'uk kaqchikel taq tzij richin chi ri chwa'q kab'ij kek'iyïr taq samajib'äl pa qach'ab'äl. Pa ri nab'ey, jun nïm samaj tajin nib'an ja ri ruq'axik pa kaqchikel ch'ab'äl ri Firefox Okik'amaya'l, jun rusamajib'al ri Mozilla Moloj. Richin nisamajïx rij ri ruka'n rayb'äl, k'o jun samajib'äl akuchi' ütz nikanöx jun tzij ri man etaman ta ruwäch ruma xsik'ïx pa ri Firefox Okik'amaya'l o pa jun ruxaq ruk'amaya'l ri Mozilla Moloj, chuqa' nirayb'ëx chi ri chwa'q kab'ij konojel ri taq tzij yetzob'ajïx ruma ri kiq'ajarik.

Wakami niqajo' yixqapeyoj apo richin kojito' chuqa' titaqa' pe rutzijol isamaj, inimaq'ij, itzijonem xtib'än ri chwa'q kab'ij, richin niqaya' rutzijol pa re ruxaq k'amaya'l re' chuqa' richin chi qonojel ri qach'alal qi' tiqetamaj, tiqanab'ej qi' pa ruwi' ri samaj tajin niqab'än pa ruwi' ri qach'ab'äl. Ri qana'oj chi tiqatunu' qetamab'al ke ri' chuqa' ri quchuq'a' richin niqasamajij chuqa' ninimär ri qach'ab'äl.